७६वा प्रजासत्ताक दिन उत्साहात साजरा – कडवई कुंभारवाडी शाळेत ध्वजारोहण कार्यक्रम

कडवई:

जि.प. प्राथमिक मराठी शाळा कडवई येथे ७६वा प्रजासत्ताक दिन मोठ्या उत्साहात आणि शिस्तबद्ध पद्धतीने साजरा करण्यात आला. या निमित्ताने विविध सांस्कृतिक आणि शैक्षणिक कार्यक्रमांचे आयोजन करण्यात आले होते.

ध्वजारोहण महालक्ष्मी टाइम्सचे पत्रकार श्री. दीपक दत्ताराम तुळसणकर यांच्या शुभहस्ते करण्यात आले. या वेळी शाळेतील शिक्षक, विद्यार्थी, पालक, ग्रामस्थ तसेच अंगणवाडी सेविका आणि मदतनीस मोठ्या संख्येने उपस्थित होते.

कार्यक्रमाची सुरुवात मुख्याध्यापक श्री. कदम सर यांच्या प्रास्ताविकाने झाली. राष्ट्रगीत गाऊन ध्वजारोहण करण्यात आले. त्यानंतर विद्यार्थ्यांनी झेंडा गीत आणि राष्ट्रभक्तीपर गीते सादर केली. विद्यार्थ्यांसाठी ‘बाल सभा’ घेऊन त्यांना खाऊ वाटप करण्यात आले.

भाषण स्पर्धेमध्ये प्रथम तीन क्रमांक मिळवणाऱ्या विद्यार्थ्यांना माजी ग्रामसेवक श्री. पाटील सर यांच्या हस्ते बक्षिसे देण्यात आली. दिवसभरात कवायत, निबंध लेखन, चित्रकला, पाढे पाठांतर, इंग्रजी शब्द पाठांतर, तसेच मुलांच्या मनोरंजनासाठी विविध स्पर्धांचे आयोजन करण्यात आले.

सायंकाळी पाच वाजता राष्ट्रीय गीत ‘वंदे मातरम’ गायन करून ध्वज अवतरण करण्यात आले. “देशासाठी एकत्र येऊन काम करूया” असा संदेश देत प्रजासत्ताक दिनाचा कार्यक्रम उत्साहात पार पडला.