आमदार राहुल आवाडे यांच्या प्रयत्नातून आयजीएममध्ये नर्सिंग कॉलेजसाठी शासनाची मान्यता

इचलकरंजी: हबीब शेखदर्जी 

दि . २५ फेब्रुवारी: येथील शासकीय इंदिरा गांधी सामान्य रुग्णालयात (आयजीएम) ४० विद्यार्थी प्रवेश क्षमतेचे नर्सिंग कॉलेज सुरू करण्यास राज्य शासनाच्या सार्वजनिक आरोग्य विभागाने अधिकृत मान्यता दिली आहे. आमदार राहुल आवाडे यांच्या सातत्यपूर्ण प्रयत्नांना यश मिळाले असून, यामुळे रुग्णालयातील आरोग्यसेवा अधिक सुसज्ज आणि अत्याधुनिक होणार आहे.

तत्कालीन इचलकरंजी नगरपरिषदेच्या वतीने सुरू केलेले हे रुग्णालय २०१६ मध्ये राज्य शासनाकडे हस्तांतरित झाले. त्यानंतर या रुग्णालयाला उपजिल्हा रुग्णालयाचा दर्जा मिळाला. याठिकाणी आवश्यक त्या सुविधा मिळाव्यात यासाठी माजी वस्त्रोद्योग मंत्री प्रकाश आवाडे यांनी शासन दरबारी पाठपुरावा केला. त्यांच्या प्रयत्नांतून रुग्णालयासाठी कोट्यवधींचा निधी मंजूर झाला, ज्यामुळे रुग्णालयाचे रूप पालटत आहे.

आमदार राहुल आवाडे यांनी इचलकरंजीतील कामगार व नागरिकांना सर्वोत्तम आरोग्यसेवा मिळावी यासाठी शासनाकडे सातत्याने पाठपुरावा केला. या प्रयत्नांतूनच २०० बेडच्या क्षमतेचे हे रुग्णालय आता ३०० बेडपर्यंत वाढविण्यास शासनाने मान्यता दिली.

नर्सिंग कॉलेजसाठी पाठपुरावा आणि मंजुरी

जिल्ह्याचे पालकमंत्री आणि आरोग्यमंत्री प्रकाश आबिटकर यांच्या उपस्थितीत झालेल्या आढावा बैठकीत आमदार राहुल आवाडे यांनी रुग्णालयातील विविध प्रश्नांची मांडणी केली आणि त्यावर तातडीने निर्णय घेण्याची मागणी केली. त्यानुसार, महाराष्ट्र राज्य सुश्रुषा व परावैद्यकीय शिक्षण मंडळाच्या सक्षमता तपासणी पथकाने रुग्णालयाची पाहणी केली आणि उपलब्ध सुविधांच्या अनुषंगाने नर्सिंग कॉलेज सुरू करण्यास सकारात्मकता दर्शवली. अखेर राज्य शासनाने अधिकृत मान्यता दिली, यामुळे इचलकरंजीकरांना मोठा दिलासा मिळाला आहे.

रुग्णालयाची वाढती गरज आणि भविष्यातील सुविधा

इचलकरंजी शहर आणि परिसरात कामगार व झोपडपट्टीवासीयांची संख्या मोठी आहे. त्यांना आरोग्याशी संबंधित अत्यावश्यक सुविधा सहज मिळाव्यात, यासाठी इंदिरा गांधी सामान्य रुग्णालयात विविध सुविधा निर्माण केल्या जात आहेत. हातकणंगले, शिरोळ तसेच सीमावर्ती भागातील नागरिकांसाठी हे रुग्णालय आता मोठा आधार बनले आहे.

नर्सिंग कॉलेज सुरू झाल्यानंतर रुग्णालयात आवश्यक तो प्रशिक्षित स्टाफ उपलब्ध होईल, वैद्यकीय सेवा अधिक सक्षम होतील आणि अत्याधुनिक औषधोपचार सहज मिळतील. यासाठी मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार आणि आरोग्यमंत्री प्रकाश आबिटकर यांचे सहकार्य लाभल्याचे आमदार राहुल आवाडे यांनी सांगितले.

याशिवाय, दिव्यांग प्रमाणपत्र सुविधा लवकरच सुरू करण्यासाठीही आपण प्रयत्नशील असल्याचे त्यांनी नमूद केले.