यंदा पाहिलांदाच कबनूर उरुसात दोन वेळा रंगणार कुस्ती मैदाने

 कंबनूर : हबीब शेखदर्जी 

दि.२५ : कबनूरच्या ऐतिहासिक उरुसाला यंदा कुस्तीचा खास तडका मिळणार आहे! प्रथमच सलग दोन दिवस कुस्तीचे जंगी मैदान रंगणार असून, कुस्तीप्रेमींसाठी ही पर्वणीच ठरणार आहे. शनिवार, दि. २९ मार्च रोजी ग्रामदैवत जंदीसो-ब्रॉनसो उरूस कुस्तीप्रेमी नागरिक समितीच्या वतीने स्वतंत्रपणे भारत विरुद्ध इराण आंतरराष्ट्रीय मोफत निकाली कुस्त्यांचे भव्य मैदान आयोजित करण्यात आले आहे. शांतीनाथ पतसंस्थेचे अध्यक्ष मिलिंद कोले व राष्ट्रवादी काँग्रेसचे नेते अशोक पाटील यांनी पत्रकार परिषदेत ही माहिती दिली.

उरुसात कुस्तीचा डबल धमाका!

कबनूर ग्रामपंचायतीने नियोजित उरुसासाठी शुक्रवार, २८ मार्च रोजी कुस्ती मैदानाचे आयोजन केले आहे. मात्र, त्याच मैदानावर दुसऱ्या दिवशी पुन्हा कुस्तीचे महासंग्राम रंगणार असल्याने गावभर चर्चेला उधाण आले आहे. पहिल्यांदाच कबनूरच्या कुस्तीप्रेमींना दोन दिवस सलग कुस्तीच्या जोरदार फडाचा आनंद लुटता येणार आहे.

स्वतंत्र कुस्ती मैदानामागील संघर्ष

पत्रकार परिषदेत अशोक पाटील यांनी स्पष्ट केले की, “शनिवारी आमचे कुस्ती मैदान होणारच! ग्रामपंचायतीच्या उरुस समितीने कुस्त्यांचे नियोजन करताना ग्रामस्थांना विचारात घेतले नाही. कबनूरमध्ये ताकदीचे पैलवान आणि जाणकार असताना बाहेरच्या इचलकरंजीच्या पैलवानांना बोलावले गेले. त्यामुळे आम्ही स्वतंत्र कुस्ती मैदान घेण्याचा निर्णय घेतला आहे.”गावकऱ्यांच्या सहभागातून लोकवर्गणीने मैदानासाठी निधी उभारला असून, नियमानुसार परवानग्या घेतल्या जात आहेत. या मैदानाचे उद्घाटन प्रतिष्ठित मान्यवरांच्या हस्ते होणार आहे.

राजकीय वर्तुळातही खमखमीत चर्चा

या कुस्ती मैदानाला ग्रामपंचायतीच्या उरुस समितीच्या अध्यक्षा सुलोचना कट्टी व उपाध्यक्ष सुधीर लिगाडे यांनी देणगी देण्याचे मान्य केले आहे. त्यामुळे त्यांच्या मूकसंमतीचा प्रश्न निर्माण झाला आहे. यासाठी प्रशासन स्वतंत्र कुस्ती मैदानासाठी परवानगी देणार का, याकडे गावकऱ्यांचे लक्ष लागले आहे.

महानायकांच्या उपस्थितीत थरारक कुस्ती सामने

अशोक पाटील आणि मिलिंद कोले यांच्या पुढाकाराने होणाऱ्या या कुस्ती महोत्सवाला राज्याचे दोन मंत्री, दोन खासदार, चार आमदार, स्थानिक पदाधिकारी, माजी व विद्यमान लोकप्रतिनिधी, तसेच नामवंत पैलवान उपस्थित राहणार आहेत. त्यामुळे हा कुस्ती सामना केवळ स्थानिक मर्यादेत राहणार नसून, राज्यभर गाजणार आहे.

कबनूरमध्ये कुस्तीचा जल्लोष!

या ऐतिहासिक कुस्ती महोत्सवाच्या निमित्ताने कबनूर गाव पुन्हा एकदा पैलवानांच्या जयघोषाने दणाणून जाणार आहे. ग्रामदैवत जंदिसो-ब्रॉनसो यांच्या उरुसात दोन दिवस सलग कुस्तीचे मैदान भरणे हा इतिहासात पहिलाच प्रसंग ठरणार आहे.   कबनूरकर सज्ज राहा! कारण यंदा उरुसात कुस्तीचा दणका जबरदस्त असणार आहे!