व्हेळ येथे विज्ञान शिबिर उत्साहात संपन्न

       ‘खेळण्यातून विज्ञान, विज्ञानातून आनंद!’ या संकल्पनेतून विद्यार्थ्यांनी विविध विज्ञान खेळणी स्वतः तयार केली. ‘उमलणारा कागदी हात’, ‘उमलणारा कागद’, ‘गरगणाऱ्या पिना’, ‘नाण्याची सर्कस’, ‘स्ट्रॉ स्प्रिंकलर’, ‘उडी मारणारी आगपेटी’ आणि ‘पेपर ग्लायडर’ यांसारख्या प्रयोगांनी शिबिरात उत्साह निर्माण केला.

       विद्यार्थ्यांमध्ये चिकित्सक विचार करण्याची क्षमता विकसित व्हावी, यासाठी ‘तहानलेला कावळा’ या परिचित गोष्टीचे प्रयोगाद्वारे परीक्षण करण्यात आले. पाण्याची पातळी, पात्राचा आकार आणि त्यात टाकलेल्या दगडांचा होणारा परिणाम यांचे निरीक्षण करून विद्यार्थ्यांनी गोष्टीतील घटनांचा वैज्ञानिक दृष्टिकोनातून विचार केला.

      पुस्तकातील विज्ञान प्रत्यक्ष प्रयोगांतून समजून घेता येते, तसेच परिसरातील सहज उपलब्ध वस्तूंच्या माध्यमातूनही वैज्ञानिक विचारांना चालना देता येते, हा महत्त्वपूर्ण संदेश या शिबिरातून विद्यार्थ्यांना मिळाला. विज्ञान म्हणजे केवळ पाठांतर नव्हे, तर निरीक्षण, प्रयोग, प्रश्न आणि शोध यांचा आनंददायी प्रवास आहे, याची जाणीव करून देणारे हे शिबिर विद्यार्थ्यांसाठी अनुभवसमृद्ध आणि संस्मरणीय ठरले.